اداکارہ مریم نفیس کا انکشاف: "مجھے جنات دکھائی دیے، کئی ماہ تک خوف میں مبتلا رہی”
کراچی (شوبز ڈیسک) – معروف اداکارہ مریم نفیس نے ایک نجی ٹی وی پروگرام میں شرکت کے دوران ایسا حیرت انگیز انکشاف کر دیا جس نے ناظرین کو چونکا دیا۔ ان کا کہنا تھا کہ ماضی میں انہیں تین سے چار مرتبہ ایسی مخلوقات دکھائی دیں جو ان کے بقول "جنات” تھے۔
مریم نے بتایا کہ ان مخلوقات کو انہوں نے سائے یا دھوئیں کی شکل میں دیکھا، اور یہ تجربہ اتنا خوفناک تھا کہ وہ کئی مہینوں تک شدید ذہنی دباؤ اور خوف کا شکار رہیں۔ ان کا کہنا تھا، "مجھے مسلسل محسوس ہوتا تھا کہ کوئی میرے آس پاس موجود ہے، اور میں تنہا ہونے سے ڈرتی تھی۔”
اداکارہ نے مزید کہا کہ اب بھی اگر وہ کراچی میں اکیلی ہوں اور ان کے شوہر امان اچانک کمرے میں داخل ہو جائیں تو وہ ڈر جاتی ہیں۔
واضح رہے کہ مریم نفیس اور ان کے شوہر امان نے حال ہی میں بیٹے کی پیدائش کا خیر مقدم کیا ہے۔ مریم نے بیٹے کی ولادت کے بعد شوبز سے وقتی وقفہ لے رکھا ہے تاہم وہ جلد اسکرین پر واپسی کے لیے پرعزم ہیں۔
مریم نفیس کا یہ انکشاف سوشل میڈیا پر بھی موضوع بحث بن چکا ہے، جہاں مداحوں نے ان کے حوصلے اور ایمانداری کو سراہا، جب کہ کچھ صارفین نے اس تجربے کو دلچسپی اور حیرت کے امتزاج کے ساتھ سنا۔
