اولڈ ٹریفورڈ میں پاکستان شرٹ پہننے پر شائق کو گراؤنڈ سے نکال دیا گیا، انگلش کرکٹ بورڈ سے شکایت
مانچسٹر:
اولڈ ٹریفورڈ کرکٹ گراؤنڈ میں بھارت اور انگلینڈ کے درمیان جاری ٹیسٹ میچ کے دوران ایک پاکستانی شائقِ کرکٹ کو محض پاکستان ٹیم کی شرٹ پہننے پر سیکیورٹی اہلکاروں نے اسٹیڈیم سے باہر نکال دیا۔
شائق، فاروق نذر، جو میچ دیکھنے کے لیے گراؤنڈ میں موجود تھے، نے بتایا کہ انہیں سیکیورٹی عملے نے کہا کہ وہ اپنی شرٹ ڈھانپ لیں یا پھر گراؤنڈ چھوڑ دیں۔
فاروق نذر کا کہنا تھا:
"میں محض میچ دیکھ رہا تھا، کوئی سیاسی نعرہ یا ہنگامہ نہیں کیا۔ مگر سیکیورٹی نے کہا کہ یا تو پاکستان کی شرٹ اتار دو یا باہر چلے جاؤ۔ یہ سراسر امتیازی سلوک ہے۔”
فاروق نذر نے اس واقعے کی شکایت انگلینڈ اینڈ ویلز کرکٹ بورڈ (ECB) اور مقامی انتظامیہ سے کر دی ہے، اور اس امید کا اظہار کیا ہے کہ ان کے ساتھ ہونے والے سلوک کی غیرجانبدارانہ تحقیقات ہوں گی۔
یہ واقعہ بھارت اور انگلینڈ کے درمیان چوتھے ٹیسٹ میچ کے دوران پیش آیا، جو ڈرا ہو گیا۔ سیریز میں انگلینڈ کو 1-2 کی برتری حاصل ہے۔
سوشل میڈیا پر ردعمل:
واقعے کے بعد سوشل میڈیا پر کرکٹ شائقین نے مختلف ردعمل کا اظہار کیا۔ کئی افراد نے اسے "کرکٹ کی روح کے منافی” قرار دیتے ہوئے مطالبہ کیا کہ شائقین کو کسی بھی ٹیم کی شرٹ پہننے کی آزادی ہونی چاہیے، جب تک وہ غیر سیاسی اور پرامن انداز میں موجود ہوں۔
اب تک ECB یا گراؤنڈ انتظامیہ کی جانب سے کوئی باضابطہ بیان سامنے نہیں آیا ہے۔
