اسلام آباد: بجلی کے شعبے میں ایک بڑی پیش رفت، حکومت نے گردشی قرضے کو 3.81 ٹریلین روپے سے کم کر کے 561 ارب روپے تک محدود کرنے کا فیصلہ کر لیا ہے۔ یہ اقدام آئی ایم ایف سے کیے گئے وعدے کی روشنی میں اٹھایا جا رہا ہے، جو ملک کے توانائی بحران کے حل کی جانب ایک مثبت اور پائیدار قدم ہے۔
حکام کے مطابق، یہ کمی 18 کمرشل بینکوں سے حاصل کیے گئے 1275 ارب روپے کے ذریعے ممکن بنائی جا رہی ہے، جس سے پاور ہولڈنگ لمیٹڈ اور آزاد پاور پروڈیوسرز (IPPs) کے بقایا جات ادا کیے جائیں گے۔ اس عمل سے نہ صرف بجلی کی پیداوار کے نظام میں اعتماد بحال ہو گا بلکہ گردشی قرضوں کا دیرینہ بحران بھی بڑی حد تک ختم ہو جائے گا۔
پاور ڈویژن کے سینئر عہدیدار نے بتایا کہ:
"ہم اس ہفتے یا اگلے ہفتے تک 1275 ارب روپے کی رقم تقسیم کرنے جا رہے ہیں تاکہ گردشی قرضہ صرف 561 ارب روپے تک محدود رہے۔”
ٹاسک فورس کی کامیاب حکمت عملی
اس پیش رفت کا سہرا پاور سیکٹر ٹاسک فورس کو دیا جا رہا ہے، جس میں وزیراعظم کے مشیر محمد علی، لیفٹیننٹ جنرل (ر) ظفر اقبال، اور SECP، CPPA-G، NEPRA کے ماہرین شامل تھے۔
ٹاسک فورس نے کامیاب مذاکرات کے ذریعے 387 ارب روپے کے لیٹ پیمنٹ انٹرسٹ معاف کروائے اور 348 ارب روپے کے واجبات کلیئر کیے، جس سے گردشی قرضوں میں نمایاں کمی ممکن ہوئی۔
