اسلام آباد: نیشنل ڈیزاسٹر مینجمنٹ اتھارٹی (این ڈی ایم اے) نے ملک میں حالیہ بارشوں سے ہونے والے جانی و مالی نقصانات کی تفصیلات جاری کر دی ہیں، جن کے مطابق اب تک 272 افراد جاں بحق جبکہ 655 افراد زخمی ہو چکے ہیں۔
این ڈی ایم اے کی رپورٹ کے مطابق جاں بحق ہونے والوں میں 93 مرد، 47 خواتین اور 132 بچے شامل ہیں، جب کہ زخمیوں کی تعداد میں 257 مرد، 182 خواتین اور 216 بچے شامل ہیں۔
گھروں اور مال مویشیوں کو نقصان
بارشوں کے نتیجے میں 1192 گھروں کو نقصان پہنچا ہے جبکہ 367 مویشی ہلاک ہو چکے ہیں، جس سے دیہی علاقوں میں معاشی مشکلات میں مزید اضافہ ہوا ہے۔
صوبہ وار جانی نقصان کی تفصیل:
پنجاب:
سب سے زیادہ متاثرہ صوبہ رہا، جہاں 145 افراد جاں بحق اور 514 زخمی ہوئے۔
خیبرپختونخوا:
اب تک 65 افراد جاں بحق جبکہ 80 زخمی ہو چکے ہیں۔
سندھ:
25 افراد جاں بحق اور 40 زخمی رپورٹ ہوئے۔
بلوچستان:
20 افراد جاں بحق اور 4 زخمی ہوئے۔
اسلام آباد:
وفاقی دارالحکومت میں 8 اموات اور 3 افراد زخمی ہوئے۔
گلگت بلتستان:
8 افراد جاں بحق اور 4 زخمی رپورٹ کیے گئے۔
آزاد کشمیر:
2 افراد جاں بحق ہوئے، تاہم زخمیوں کی اطلاع نہیں ملی۔
این ڈی ایم اے کی اپیل
این ڈی ایم اے نے عوام سے اپیل کی ہے کہ وہ غیر ضروری سفر سے گریز کریں، نشیبی علاقوں میں رہائش پذیر افراد حفاظتی اقدامات اختیار کریں، اور مقامی انتظامیہ سے رابطے میں رہیں۔ ادارے کی جانب سے امدادی سرگرمیاں جاری ہیں اور متاثرہ علاقوں میں فوری ریلیف فراہم کیا جا رہا ہے۔
