ایشیا کپ سے قبل بڑا ایکشن! پاکستان، افغانستان اور یو اے ای کے درمیان شارجہ میں تین ملکی ٹی ٹوئنٹی سیریز کی تیاریاں مکمل

شارجہ: ایشیا کپ سے قبل کرکٹ شائقین کے لیے بڑی خوشخبری، اگلے ماہ شارجہ میں پاکستان، افغانستان اور متحدہ عرب امارات کے درمیان تین ملکی ٹی ٹوئنٹی سیریز کھیلی جائے گی۔

ابتدائی منصوبے کے مطابق افغانستان کو پاکستان آ کر دو طرفہ سیریز کھیلنی تھی، تاہم اب اس فارمیٹ کو وسعت دے کر یو اے ای کو بھی شامل کیا گیا ہے، جس سے سیریز کو مزید دلچسپ اور مسابقتی بنا دیا گیا ہے۔

ذرائع کے مطابق سیریز کا انعقاد اگست کے آخری ہفتے میں متوقع ہے، اور جیسے ہی لاجسٹک و براڈ کاسٹ امور کو حتمی شکل دی جائے گی، مکمل شیڈول کا باضابطہ اعلان کر دیا جائے گا۔

اس تین ملکی سیریز کا مقصد ایشیا کپ 2025 کی تیاریوں کو مؤثر بنانا ہے، تاکہ ٹیمیں میگا ایونٹ سے قبل کمبی نیشن کو مضبوط کر سکیں اور کنڈیشنز سے ہم آہنگی پیدا کر سکیں۔

سیریز شارجہ کے تاریخی کرکٹ اسٹیڈیم میں منعقد ہوگی، جہاں شائقین کو مختصر فارمیٹ کی سنسنی خیز کرکٹ دیکھنے کو ملے گی۔

پی سی بی اور دیگر بورڈز کی جانب سے ٹیموں کی شرکت کی تصدیق کے بعد سیریز کو کرکٹ کیلنڈر میں ایک اہم مقام حاصل ہوگیا ہے، اور یہ ممکنہ طور پر ایشیا کپ سے قبل کھلاڑیوں کے لیے آخری بڑا امتحان ثابت ہوگی۔