واشنگٹن (بین الاقوامی نیوز ڈیسک) — امریکی ڈیموکریٹ سینیٹر کوری بُکر نے غزہ میں جاری انسانی بحران پر گہری تشویش کا اظہار کرتے ہوئے عالمی برادری کو جھنجھوڑ کر رکھ دیا۔ انہوں نے کہا ہے کہ غزہ میں خواتین، بچوں اور بزرگوں کو درپیش بھوک، پیاس اور تکلیف کا منظر دل دہلا دینے والا ہے اور فوری امدادی اقدامات ناگزیر ہو چکے ہیں۔
سینیٹر کوری بُکر نے سوشل میڈیا پلیٹ فارم ایکس (سابقہ ٹوئٹر) پر اپنے بیان میں واضح کیا کہ:
"غزہ میں ضروری خوراک، پانی اور ادویات کی شدید قلت ہے۔ ہر لمحہ قیمتی انسانی جانیں ضائع ہو رہی ہیں۔ یہ ہماری اجتماعی اخلاقی ذمہ داری ہے کہ ہم فوری طور پر متاثرہ افراد تک امداد پہنچائیں۔”
انہوں نے امریکی و اسرائیلی حمایت یافتہ غزہ ہیومینٹیرین فاؤنڈیشن (GHF) کی کارکردگی پر سوال اٹھاتے ہوئے کہا کہ اس کی حکمتِ عملی مؤثر نہیں رہی۔ ساتھ ہی انہوں نے اس تاثر کو بھی مسترد کر دیا کہ امداد دہشت گرد گروہوں کو دی جا رہی ہے۔ ان کے مطابق، معروف امریکی اخبار نیویارک ٹائمز نے واضح کیا ہے کہ اسرائیلی فوج کے پاس اس حوالے سے کوئی ٹھوس ثبوت نہیں۔
عالمی ضمیر کی پکار
سینیٹر بُکر نے دنیا بھر کی حکومتوں اور تنظیموں پر زور دیا کہ وہ سیاسی مفادات سے بالاتر ہو کر انسانی جانوں کو ترجیح دیں۔ انہوں نے کہا کہ:
"اگر امداد میں تاخیر ہوئی تو بچوں، حاملہ خواتین اور دیگر معصوم شہریوں کو ناقابلِ تلافی نقصان پہنچے گا۔ وقت کی اہم ترین ضرورت ہے کہ ہم متحد ہو کر اس بحران کا مقابلہ کریں۔”
ایک نئی امید
سینیٹر کوری بُکر کا یہ بیان دنیا بھر میں ان تمام انسان دوست حلقوں کے لیے امید کی ایک کرن ہے جو غزہ میں قیامت خیز صورتحال پر پریشان ہیں۔ ان کی آواز مظلوموں کے حق میں ایک مضبوط پیغام ہے کہ انسانیت اب بھی زندہ ہے۔
