پاکستان شوبز کے سینئر اداکار عاصم بخاری کی صحت میں بہتری، اسپتال سے ڈسچارج

لاہور: پاکستان شوبز انڈسٹری کے معروف اور سینئر اداکار عاصم بخاری جو چند روز قبل دل کے دورے کے باعث پنجاب انسٹی ٹیوٹ آف کارڈیالوجی لاہور میں داخل تھے، اب مکمل صحت یاب ہو کر اسپتال سے گھر واپس لوٹ گئے ہیں۔

عاصم بخاری پاکستان کے معروف اداکار، ادیب اور شاعر ہیں جنہوں نے کئی فلموں، ڈراموں اور تھیٹر میں اپنی اداکاری کے جوہر دکھائے ہیں۔ چند روز قبل دل کا دورہ پڑنے کے باعث ان کے پھیپھڑوں میں پانی بھر گیا تھا جس پر فوری طبی امداد فراہم کی گئی۔

اداکار کی صحت کی تازہ ترین صورتحال کے مطابق، وہ اب مکمل طور پر صحت مند ہیں اور ڈاکٹروں نے انہیں اسپتال سے ڈسچارج کر دیا ہے۔ عاصم بخاری کے مداح اور شوبز کمیونٹی نے ان کی صحت یابی کے لیے دعا کی ہے۔

عاصم بخاری کی صحت یابی پر شوبز حلقوں نے خوشی کا اظہار کرتے ہوئے ان کے لیے نیک خواہشات کا اظہار کیا ہے اور دعا کی ہے کہ وہ جلد اپنے فن کے ذریعے شائقین کے دل جیتتے رہیں۔