پاکستان اسٹاک ایکسچینج میں ملا جلا رجحان، 100 انڈیکس میں 609 پوائنٹس کا اضافہ
کراچی: پاکستان اسٹاک ایکسچینج (PSX) میں کاروباری ہفتے کے دوران ملا جلا رجحان دیکھنے کو ملا، تاہم مجموعی طور پر سرمایہ کاروں کے لیے ہفتہ مثبت رہا۔ ہفتے کے اختتام پر 100 انڈیکس میں 609 پوائنٹس کا اضافہ ریکارڈ کیا گیا، جس کے بعد انڈیکس 139,207 پوائنٹس پر بند ہوا۔
کاروباری ہفتے کے دوران 100 انڈیکس نے 2,052 پوائنٹس کے اتار چڑھاؤ کا سامنا کیا، جو مارکیٹ میں غیر یقینی صورتحال اور سرمایہ کاروں کی محتاط حکمت عملی کی عکاسی کرتا ہے۔ تاہم، مارکیٹ نے تاریخ کی بلند ترین سطح بھی چھوئی اور 140,202 پوائنٹس کی بلندی کو چھوا، جو ملکی معیشت میں بہتری اور سرمایہ کاروں کے اعتماد کی علامت ہے۔
مالیاتی ماہرین کا کہنا ہے کہ حالیہ ملکی اقتصادی اشاریے، بجٹ کے بعد سرمایہ کاری کے مواقع اور بیرونی مالی تعاون کی امیدیں مارکیٹ کی کارکردگی میں مثبت کردار ادا کر رہی ہیں۔ ماہرین کا یہ بھی کہنا ہے کہ اگر سیاسی اور معاشی استحکام برقرار رہا تو آئندہ ہفتوں میں اسٹاک مارکیٹ میں مزید ترقی کے امکانات روشن ہیں۔
کاروباری حلقے توقع کر رہے ہیں کہ ملکی اور عالمی معاشی حالات میں بہتری کے ساتھ پاکستان اسٹاک ایکسچینج سرمایہ کاروں کو مزید منافع دے گا۔
