اسلام آباد — حکومت کی جانب سے بجلی کے بلوں میں دی جانے والی سبسڈی اور رعایتیں ختم ہونے کے بعد آئندہ مہینوں میں صارفین کو بجلی کے نرخوں میں نمایاں اضافے کا سامنا کرنا پڑ سکتا ہے۔ ماہرین کا کہنا ہے کہ یہ اضافہ مہنگائی کے بوجھ تلے دبے عوام کے لیے ایک اور شدید جھٹکا ہوگا۔
ذرائع کے مطابق، حکومت کا "سستی بجلی پیکیج” اب اپنے اختتامی مراحل میں داخل ہو چکا ہے۔ گزشتہ مالی سال کی تیسری سہ ماہی ایڈجسٹمنٹ کے تحت دیے گئے 1.55 روپے فی یونٹ کے ریلیف کی مدت رواں ماہ کے اختتام پر ختم ہو رہی ہے، جب کہ اس سے قبل 4.51 روپے فی یونٹ کا ریلیف اور کراچی کے صارفین کے لیے 3.61 روپے فی یونٹ کی سہولت بھی ختم کی جا چکی ہے۔
مزید براں، جون میں ختم ہونے والی دیگر سہولتوں میں:
1.90 روپے فی یونٹ کی دوسری سہ ماہی ایڈجسٹمنٹ
1.71 روپے فی یونٹ کی پیٹرولیم لیوی میں کمی
اور فیول چارجز ایڈجسٹمنٹ (FCA) کے تحت 90 پیسے فی یونٹ کا ریلیف شامل ہیں۔
فی الوقت، صارفین کو بنیادی ٹیرف میں 1.16 روپے فی یونٹ اور ماہانہ ایڈجسٹمنٹ میں 50 پیسے فی یونٹ کا جزوی ریلیف حاصل ہے، لیکن حکومتی ذرائع کے مطابق یہ سہولتیں بھی مرحلہ وار ختم کی جا رہی ہیں۔
یاد رہے کہ 3 اپریل کو وزیرِ اعظم شہباز شریف نے گھریلو صارفین کے لیے 7.41 روپے فی یونٹ کمی کا اعلان کیا تھا، جو عارضی ریلیف کے طور پر نافذ کیا گیا تھا۔
ماہرین اقتصادیات خبردار کر رہے ہیں کہ اگر موجودہ ریلیف مکمل طور پر ختم کر دیا گیا تو بجلی کے بلوں میں خاطر خواہ اضافہ ناگزیر ہو جائے گا، جس سے متوسط اور کم آمدنی والے طبقے کو شدید مشکلات کا سامنا کرنا پڑ سکتا ہے۔
