واشنگٹن ڈی سی: ڈپٹی وزیراعظم و وزیر خارجہ سینیٹر محمد اسحٰق ڈار امریکا کے سرکاری دورے پر واشنگٹن پہنچ گئے، جہاں پاکستانی سفیر رضوان سعید شیخ اور سفارتخانے کے سینئر حکام نے ان کا پرتپاک استقبال کیا۔
دفتر خارجہ کے مطابق اس اہم دورے کے دوران اسحٰق ڈار امریکی وزیر خارجہ مارکو روبیو سے ملاقات کریں گے، جو آج محکمہ خارجہ میں منعقد ہو گی۔ اس ملاقات میں پاک-امریکہ دوطرفہ تعلقات کے مختلف پہلوؤں پر تفصیلی گفتگو متوقع ہے، جس میں تجارت، سرمایہ کاری اور اقتصادی تعاون کے فروغ پر خصوصی توجہ دی جائے گی۔
عہدیداروں کے مطابق دونوں ممالک کے وزرائے خارجہ باہمی دلچسپی کے علاقائی اور عالمی امور پر بھی تبادلہ خیال کریں گے، جس سے باہمی روابط کو مزید مضبوط بنانے کی توقع کی جا رہی ہے۔
اپنے قیام کے دوران اسحٰق ڈار معروف امریکی تھنک ٹینک "دی اٹلانٹک کونسل” میں بھی خطاب کریں گے، جہاں وہ پاکستان کا مؤقف پیش کریں گے، خطے کی بدلتی ہوئی صورتحال اور پاک-امریکہ تعلقات کے مستقبل پر روشنی ڈالیں گے۔
اس اہم دورے کو دونوں ممالک کے درمیان بڑھتے ہوئے تعلقات اور شراکت داری کو نئی جہت دینے کی کوشش کے طور پر دیکھا جا رہا ہے۔
