مانچسٹر ٹیسٹ: بھارت کا مستحکم آغاز، پہلے دن کے اختتام پر 4 وکٹ پر 264 رنز
مانچسٹر: انگلینڈ کے خلاف ہوم سیریز کے چوتھے ٹیسٹ میچ کے پہلے روز بھارت نے شاندار بیٹنگ کا مظاہرہ کرتے ہوئے 4 وکٹوں کے نقصان پر 264 رنز بنائے۔ پہلے دن کا کھیل بھارتی بلے بازوں کے نام رہا، جنہوں نے محتاط مگر مؤثر بیٹنگ کا مظاہرہ کیا۔
رویندرا جڈیجا اور شردل ٹھاکر کریز پر موجود ہیں اور دونوں نے 19، 19 رنز کے ساتھ دن کا اختتام کیا۔ نوجوان بیٹر سائی سدرشن نے عمدہ بیٹنگ کرتے ہوئے 61 رنز کی اہم اننگز کھیلی۔
ایک ناخوشگوار لمحہ اس وقت آیا جب وکٹ کیپر بلے باز ریشابھ پنت ریورس شاٹ کھیلتے ہوئے ووکس کی گیند پر زخمی ہو گئے۔ گیند ان کے پاؤں پر لگی، جس کے بعد وہ شدید تکلیف میں دکھائی دیے اور ریٹائرڈ ہرٹ ہو کر میڈیکل کارٹ کے ذریعے میدان سے باہر لے جائے گئے۔
اس سے قبل بھارتی اوپنرز نے شاندار آغاز فراہم کیا۔ یشاسوی جیسوال نے 58 رنز اور لوکیش راہول نے 46 رنز کی اننگز کھیلی، جبکہ دونوں نے مل کر 94 رنز کی افتتاحی شراکت قائم کی۔ کپتان شبمن گل صرف 12 رنز بنا سکے۔
انگلینڈ کی جانب سے بین اسٹوکس نے سب سے کامیاب باؤلنگ کرتے ہوئے 2 وکٹیں حاصل کیں، جبکہ ووکس اور لیام ڈوسن نے ایک، ایک وکٹ حاصل کی۔
بھارتی ٹیم کی نظر دوسرے دن ایک بڑے اسکور کی جانب ہے، جبکہ شائقین کو امید ہے کہ پنت کی چوٹ سنگین نہ ہو اور وہ دوبارہ بیٹنگ کے لیے میدان میں واپس آ سکیں۔
