پشاور: خیبرپختونخوا حکومت کا اعلیٰ سطحی 12 رکنی وفد مشیر اطلاعات بیرسٹر محمد علی سیف کی سربراہی میں چین روانہ ہو گیا۔ وفد چینی وزارت خارجہ کی دعوت پر مذہبی سفارتکاری پروگرام کے تحت دورہ کر رہا ہے، جس کا مقصد چین، پاکستان اور مسلم دنیا کے مابین سماجی، مذہبی اور ثقافتی روابط کو مزید مضبوط بنانا ہے۔
وفد میں وزیر مذہبی امور عدنان قادری، وزیر سماجی بہبود قاسم علی شاہ، سینئر سیاستدان سکندر شیرپاؤ، ڈی جی اسلامک ریسرچ انسٹیٹیوٹ ڈاکٹر ضیاء، وفاق المدارس کے ترجمان مولانا عبدالقدوس، اور دارالعلوم کراچی کے نائب صدر مولانا زبیر اشرف عثمانی سمیت دیگر اہم شخصیات شامل ہیں۔
بیرسٹر سیف نے روانگی سے قبل گفتگو کرتے ہوئے کہا کہ وفد بیجنگ، ارومچی اور کاشغر کا دورہ کرے گا، جہاں چینی وزارت خارجہ، کمیونسٹ پارٹی کے رہنماؤں، مسلم اسکالرز، اور تعلیمی اداروں سے ملاقاتیں طے ہیں۔ ان ملاقاتوں کا مقصد مذہبی ہم آہنگی، بین المذاہب مکالمے اور ثقافتی تعاون کو فروغ دینا ہے۔
انہوں نے امید ظاہر کی کہ اس دورے سے پاکستان اور چین کے درمیان تاریخی تعلقات کو نئی وسعت ملے گی اور مسلم دنیا کے ساتھ اشتراک عمل میں بھی بہتری آئے گی۔
