لاہور: انسداد دہشت گردی عدالت لاہور نے پاکستان تحریک انصاف (پی ٹی آئی) کے رہنما اور پنجاب اسمبلی میں اپوزیشن لیڈر ملک احمد بچھر کو 9 مئی کے مقدمے میں 10 سال قید کی سزا سنا دی ہے۔
کیس کی سماعت جج ارشد جاوید نے کوٹ لکھپت جیل میں کی، جہاں جیل ٹرائل کے دوران ملزمان کے وکلاء اور سرکاری وکیل نے حتمی دلائل پیش کیے۔ عدالت نے شیئر پاؤ پل پر اشتعال انگیز تقاریر اور جلاؤ گھیراؤ کیس کا ٹرائل مکمل کرتے ہوئے مختصر فیصلہ سنایا۔
جیل ٹرائل اور گواہوں کے بیانات
مقدمے میں پی ٹی آئی کے کئی اہم رہنما نامزد تھے، جن کے خلاف 61 سرکاری گواہوں نے بیانات ریکارڈ کرائے۔ عدالت نے شاہ محمود قریشی سمیت 14 ملزمان کا ٹرائل مکمل کر لیا ہے۔
یاسمین راشد کیس کا فیصلہ مؤخر
عدالت نے ریمارکس دیے کہ ڈاکٹر یاسمین راشد کے وکیل کل صبح 10 بجے اپنے دلائل مکمل کریں گے، جس کے بعد ان کے کیس پر فیصلہ سنایا جائے گا۔
