اسلام آباد (سیاسی رپورٹر) — پاکستان تحریک انصاف (پی ٹی آئی) کے چیئرمین بیرسٹر گوہر علی خان نے دوٹوک الفاظ میں کہا ہے کہ "مذاکرات کا وقت ختم ہو چکا ہے، اب وہی ہوگا جو عمران خان ہدایات دیں گے۔”
انہوں نے یہ بات جوڈیشل کمپلیکس اسلام آباد میں میڈیا سے گفتگو کرتے ہوئے کہی، جہاں وہ پارٹی معاملات اور سینیٹ انتخابات کے حوالے سے اہم نکات پر روشنی ڈال رہے تھے۔
سینیٹ انتخابات پر وضاحت
بیرسٹر گوہر نے کہا کہ خیبر پختونخوا میں سینیٹ انتخابات خوش اسلوبی سے مکمل ہوئے اور پی ٹی آئی نے اپنے تمام امیدوار بانی چیئرمین عمران خان کی مشاورت سے پہلے ہی مارچ 2024 میں فائنل کر لیے تھے۔ مخصوص نشستوں کے عدالتی فیصلے کے بعد وقتی تعطل آیا تھا، تاہم صورتحال اب پارٹی کے حق میں بہتر ہوئی ہے۔
"ہمیں چھ سیٹیں ملی ہیں، یہ ہمارے لیے بہترین نتیجہ ہے۔”
مرزا آفریدی سے متعلق افواہوں کی تردید
انہوں نے اس تاثر کو مسترد کیا کہ 9 مئی کے بعد پریس کانفرنس کرنے والے افراد کو سینیٹ کے ٹکٹ دیے جا رہے ہیں۔ انہوں نے مرزا آفریدی کی مثال دیتے ہوئے کہا:
"مرزا آفریدی نے پارٹی کے خلاف کوئی بیان نہیں دیا، اور ان کا نام خود خان صاحب نے فائنل کیا۔ وہ پارٹی مفادات کے ساتھ ہمیشہ کھڑے رہے ہیں۔”
عمران خان سے ملاقات پر پابندی، اور پارٹی پوزیشن
بیرسٹر گوہر کا کہنا تھا کہ بانی چیئرمین عمران خان سے ملاقاتوں کے حوالے سے عدالتی فیصلے موجود ہیں، لیکن ان پر عملدرآمد نہیں ہو رہا۔ انہوں نے انکشاف کیا کہ آخری ملاقات بیرسٹر سیف کی ہوئی تھی، اس کے بعد صرف عمران خان کی بہنوں کو ملنے کی اجازت دی گئی۔
"لوگ اس پر شکوک و شبہات کا اظہار کرتے ہیں۔”
مذاکرات بند، تحریک عمران خان کے اشارے پر چلے گی
چیئرمین پی ٹی آئی کا کہنا تھا کہ:
"اب مذاکرات کا وقت ختم ہو گیا ہے۔ اب جو بھی ہوگا، وہ خان صاحب کی ہدایات کے مطابق ہوگا۔ وہ جیل سے خود احتجاج کی قیادت کریں گے۔”
انہوں نے مزید کہا کہ پی ٹی آئی سے لوگ خود نکلتے ہیں، کسی کو نکالنا نہیں پڑتا، اور اب وقت ہے کہ "دو سال کی سختیوں کے بعد حالات معمول پر آئیں۔”
