لاہور: پنجاب اسمبلی میں سینیٹ کی خالی نشست پر ہونے والے ضمنی انتخاب میں مسلم لیگ ن کے امیدوار حافظ عبدالکریم نے 243 ووٹ حاصل کر کے کامیابی حاصل کر لی ہے۔
غیر سرکاری اور غیر حتمی نتائج کے مطابق اپوزیشن کے امیدوار مہر عبدالستار نے 99 ووٹ حاصل کیے۔ کل 368 ووٹوں میں سے 345 ووٹ کاسٹ کیے گئے، جن میں سے 3 ووٹ مسترد قرار دیے گئے۔
پولنگ کا عمل شام 4 بجے تک جاری رہا جس کے لیے پنجاب اسمبلی کو پولنگ اسٹیشن مقرر کیا گیا تھا۔ پنجاب الیکشن کمیشن کے تحت الیکشن کمشنر نے ریٹرننگ آفیسر کے فرائض سر انجام دیے۔
سینیٹ الیکشن میں وزیر اعلیٰ پنجاب مریم نواز اور سینئر وزیر مریم اورنگزیب نے بھی اپنا ووٹ کاسٹ کیا۔ مسلم لیگ ن نے چیف وہپ رانا ارشد کو پولنگ ایجنٹ تعینات کیا جبکہ اپوزیشن کی جانب سے رانا شہباز پولنگ ایجنٹ کے فرائض انجام دے رہے تھے۔
یہ انتخاب مرکزی جمعیت اہلحدیث پاکستان کے سینئر سینیٹر پروفیسر ساجد میر کی وفات کے بعد خالی ہوئی نشست پر ہوا۔ اس نشست کے لیے مسلم لیگ ن کے حافظ عبدالکریم، اپوزیشن کے مہر عبدالستار کے علاوہ آزاد امیدوار خدیجہ صدیقی اور اعجاز حسین بھی میدان میں تھے۔
پنجاب اسمبلی میں مسلم لیگ ن اور اتحادیوں کے کل 261 ارکان جبکہ اپوزیشن اتحاد کے 108 ارکان ہیں، کامیابی کے لیے امیدوار کو کم از کم 184.5 ووٹ حاصل کرنا ضروری تھے۔
