یروشلم: اسرائیلی وزیر اعظم بنیامین نیتن یاہو خراب خوراک کھانے کے باعث شدید طبیعت خرابی کا شکار ہو گئے ہیں، جس کے باعث وہ ہفتہ وار کابینہ اجلاس میں شرکت نہیں کر سکے۔ ان کے دفتر کے مطابق، وزیر اعظم کو فوڈ پوائزننگ ہوئی ہے اور ڈاکٹرز کی ہدایت پر وہ آئندہ تین روز تک گھر پر آرام کریں گے جبکہ سرکاری امور وہیں سے سرانجام دیے جائیں گے۔
نیتن یاہو کی طبیعت رات کے وقت بگڑ گئی جس پر اسرائیل کے معروف یونیورسٹی اسپتال، عین کریم کے ڈاکٹر ایلون ہرشکو نے ان کا گھر پر معائنہ کیا۔ معائنے کے بعد ڈاکٹرز نے بتایا کہ وزیر اعظم کو آنتوں کی سوزش لاحق ہے، جو خراب خوراک کے نتیجے میں ہوئی۔
وزیر اعظم کے دفتر کی جانب سے جاری کردہ بیان میں کہا گیا ہے کہ نیتن یاہو کی حالت اب مستحکم ہے، تاہم ڈی ہائیڈریشن (پانی کی کمی) کے باعث انہیں IV فلوئڈز دیے جا رہے ہیں۔
پچھلے چند برسوں میں متعدد طبی مسائل کا سامنا
75 سالہ نیتن یاہو حالیہ برسوں میں مختلف طبی پیچیدگیوں کا سامنا کرتے رہے ہیں۔ ان کی طبی تاریخ کچھ یوں ہے:
دسمبر 2024: پروسٹیٹ غدود کا آپریشن
مارچ 2024: ہرنیا (hernia) کی سرجری
2024: فلو کے باعث کئی دن آرام
جولائی 2023: دل کی عارضی بندش کے بعد پیس میکر کی تنصیب
2023: ڈی ہائیڈریشن کے باعث اسپتال داخل
جنوری 2023: طبی رپورٹ میں صحت کو "مکمل طور پر نارمل” قرار دیا گیا
حکومتی سرگرمیاں جاری رکھنے کا اعلان
دفتر وزیر اعظم کا کہنا ہے کہ نیتن یاہو مکمل آرام کے ساتھ ساتھ ضروری حکومتی فیصلے اور امور اپنے گھر سے نمٹاتے رہیں گے، اور فی الحال ان کی حالت کسی بڑے خطرے میں نہیں ہے۔
