پشاور – پاکستان تحریک انصاف (پی ٹی آئی) کی پارلیمانی پارٹی نے خیبر پختونخوا اسمبلی کے آج ہونے والے اجلاس کا بائیکاٹ کرنے کا فیصلہ کیا ہے۔ یہ فیصلہ پارٹی کے اندرونی اجلاس میں کیا گیا جو وزیر اعلیٰ خیبر پختونخوا علی امین گنڈا پور کی صدارت میں ہوا۔
خیبر پختونخوا اسمبلی کا اجلاس، جو مخصوص نشستوں کے حوالے سے منعقد ہونا تھا، دو گھنٹے سے زائد کی تاخیر کے بعد شروع ہوا۔ اس دوران اپوزیشن جماعتوں کے اراکین ایوان میں پہنچ گئے، تاہم پی ٹی آئی اراکین کو اسمبلی ہال کے بجائے پارلیمانی پارٹی کے اجلاس میں شرکت کی ہدایت دی گئی۔
پارلیمانی پارٹی کے اجلاس میں موجودہ سیاسی صورت حال، مخصوص نشستوں کا معاملہ اور اسمبلی کی کارروائی پر غور کیا گیا، جس کے بعد بائیکاٹ کا فیصلہ سامنے آیا۔
پی ٹی آئی ذرائع کے مطابق، پارٹی مخصوص نشستوں کی تقسیم، انتخابی عمل اور مبینہ سیاسی مداخلت پر شدید تحفظات رکھتی ہے، جس کے پیشِ نظر یہ بائیکاٹ ایک سیاسی پیغام کے طور پر دیا گیا ہے۔
اب تک حکومت کی جانب سے پی ٹی آئی کے اس فیصلے پر کوئی باضابطہ ردعمل سامنے نہیں آیا، تاہم سیاسی حلقوں میں اس پیش رفت کو اہم موڑ قرار دیا جا رہا ہے۔
