اسلام آباد (19 جولائی 2025): نائب وزیراعظم و وزیر خارجہ اسحاق ڈار اور سابق وزیر داخلہ شیخ رشید احمد ایک ہی پرواز سے برطانیہ روانہ ہو گئے۔ دونوں رہنما برٹش ایئرویز کی پرواز بی اے 2160 کے ذریعے وفاقی دارالحکومت اسلام آباد سے لندن کے لیے روانہ ہوئے۔
ذرائع کے مطابق یہ محض ایک اتفاق ہے کہ دونوں سیاسی شخصیات ایک ہی طیارے میں سفر کر رہی ہیں۔ دونوں رہنماؤں کے درمیان کسی رسمی ملاقات کی کوئی اطلاع موصول نہیں ہوئی ہے، اور بتایا گیا ہے کہ وہ اپنی علیحدہ مصروفیات کے تحت برطانیہ روانہ ہوئے ہیں۔
واضح رہے کہ اسحاق ڈار سرکاری امور کی انجام دہی کے لیے لندن جا رہے ہیں، جبکہ شیخ رشید کی روانگی کی وجوہات ذاتی یا سیاسی ہو سکتی ہیں، تاہم اس حوالے سے تاحال کوئی باضابطہ بیان جاری نہیں کیا گیا۔
سیاسی حلقوں میں اس مشترکہ سفر کو دلچسپی کی نگاہ سے دیکھا جا رہا ہے، اگرچہ دونوں رہنماؤں کی ملاقات کے امکانات فی الحال کم نظر آتے ہیں۔
