پاکستان چیمپئنز کی شاندار شروعات، ورلڈ چیمپئن شپ آف لیجنڈز 2025ء کا پہلا معرکہ فتح کرلیا!
لیڈز (اسپورٹس ڈیسک) – پاکستان چیمپئنز نے ورلڈ چیمپئن شپ آف لیجنڈز 2025ء کا فاتحانہ آغاز کرتے ہوئے افتتاحی میچ میں میزبان انگلینڈ چیمپئنز کو دلچسپ مقابلے کے بعد 5 رنز سے شکست دے دی۔
انگلینڈ میں جاری اس ایونٹ کے پہلے میچ میں انگلینڈ چیمپئنز نے ٹاس جیت کر پاکستان کو بیٹنگ کی دعوت دی۔ پاکستان چیمپئنز نے مقررہ 20 اوورز میں 9 وکٹوں کے نقصان پر 160 رنز بنائے۔
کپتان محمد حفیظ نے عمدہ بیٹنگ کا مظاہرہ کرتے ہوئے 34 گیندوں پر 54 رنز کی دلکش اننگز کھیلی، جب کہ عامر یامین نے آخر میں صرف 12 گیندوں پر 27 رنز کی برق رفتار اور ناقابل شکست اننگز کھیل کر اسکور کو مضبوط کیا۔
جواب میں انگلینڈ چیمپئنز کی ٹیم مطلوبہ ہدف کے قریب پہنچ کر بھی جیت نہ سمیٹ سکی اور مقررہ اوورز میں 3 وکٹوں کے نقصان پر 155 رنز تک محدود رہی۔
فل مسٹرڈ نے 51 گیندوں پر 58 رنز بنائے، جب کہ ای این بیل 35 گیندوں پر 51 رنز کے ساتھ ناٹ آؤٹ رہے۔ کپتان ایون مورگن بھی 12 گیندوں پر 16 رنز بناکر ناٹ آؤٹ رہے، لیکن پاکستانی بولرز کی نپی تلی بولنگ نے انگلش بلے بازوں کو کھل کر کھیلنے نہ دیا۔
پاکستان کی جانب سے رومان رئیس، عامر یامین اور سہیل تنویر نے ایک ایک وکٹ حاصل کی، جب کہ فیلڈنگ میں بھی ٹیم کا مجموعی مظاہرہ متاثرکن رہا۔
شاندار آل راؤنڈ کارکردگی پر محمد حفیظ کو مین آف دی میچ کا اعزاز دیا گیا۔
پاکستان کی جیت نے ایونٹ کے باقی میچز کے لیے توقعات بڑھا دیں، شائقین پرجوش
پاکستان چیمپئنز کی اس کامیابی نے شائقین کرکٹ کو خوشی سے جھومنے پر مجبور کر دیا ہے، اور اب نظریں اگلے مقابلے پر مرکوز ہیں جہاں ٹیم اپنی فتوحات کا سلسلہ جاری رکھنے کے لیے پرعزم نظر آتی ہے۔
