ایپل کی جانب سے آئی فون صارفین کو انتباہ

کیلیفورنیا: ٹیکنالوجی کمپنی ایپل نے اپنے صارفین کو خبردار کیا ہے کہ وہ اپنے سرہانے آئی فون رکھ کر سونے سے گریز کریں۔کمپنی کی جانب سے صارفین کو متنبہ کیا گیا ہے کہ وہ فون یا چارجر کو اپنی جِلد سے براہ راست لگنے سے بچیں۔کمپنی کی جانب سے جاری ہدایات میں کہا گیا کہ جب بھی کوئی ڈیوائس، پاور ایڈیپٹر یا وائرلیس چارجر پاور سورس سے جڑا ہو تو ان کو سرہانے رکھ کر سونے یا چادر یا تکیے کے اندر یا جسم پر رکھ کر سونے سے گریز کیا جائے۔کمپنی نے صارفین کو مطلع کیا کہ فون کو چارج کرتے وقت اس کی اسکرین اوپر کی جانب ہونی چاہیئے۔ مزید برآں اگر صارفین کو فون سے خارج ہونے والی تپش کو محسوس کرنے میں کسی قسم کا مسئلہ ہو تو انہیں خصوصی احتیاط برتنی چاہیئے۔ایپل نے صارفین سے یہ بھی کہا کہ انہیں پاور سورس سے جڑے کنیکٹر اور چارجنگ کیبل کے طویل مدت تک جلد سے ٹکرانے سے بچنا چاہیئے۔ بے احتیاطی نقصان کا سبب ہوسکتی ہے۔ یہاں تک کہ چارجنگ کیبل پر سونے یا بیٹھنے سے اجتناب کرنا چاہیئے۔