سوات : پاکستان کی جنت نظیر وادی سوات کا خوش ذائقہ پھل آلوچہ ملک بھر میں مشہور ہے، وادی سے بڑی تعداد میں آلوچہ کی سپلائی جاری ہے۔ سوات کو اللہ تعالٰی نے خوبصورتی کے ساتھ ہر موسم میں پھل اور میوہ جات سے نوازا ہے۔ موسم گرما میں وادی سوات میں مختلف پھل بھی پائے جاتے ہیں جن میں آلوچہ کو اس موسم کا سب سے پسندیدہ پھل مانا جاتا ہے۔سوات میں خوش رنگ آلوچہ کی بہار آچکی ہے اور ساتھ اس خوش ذائقہ پھل کی ملک بھر میں سپلائی کا کام بھی شروع ہوچکا ہے۔ سوات کے تحصیل بریکوٹ میں اس سوغات آلوچہ کو دیدہ زیب ڈبوں میں پیک کرکے ملک بھر کی چھوٹے بڑے مارکیٹوں میں سپلائی کیا جا رہا ہے۔مقامی زمینداروں کا کہنا ہے کہ جون کے مہینے میں آلوچہ کی فصل پک جاتی ہے پھر اسے احتیاط سے توڑا جاتا ہے تاکہ یہ خراب نہ ہو۔دوسری جانب مارکیٹ میں بہتر ریٹ ملنے پر باغ مالکان خوش تو ہیں مگر سبسڈی نہ ملنے پر حکومت سے نالاں بھی نظر آتے ہیں۔اس حوالے سے ان کا کہنا تھا کہ اگر حکومت ان زمینداروں کو ادویات اور کھاد پر سبسڈی دے دے تو باغات کے مالکان کو فائدہ ہوگا اور آلوچہ کی پیداوار کو مزید بڑھایا جاسکتا ہے۔
0
