0

موسم گرما کی جھلسا دینے والی ہوا جان لیوا ثابت ہو سکتی ہے، عوام کے لیے الرٹ جاری

اسلام آباد : نیشنل ڈیزاسٹر مینجمنٹ اتھارٹی (این ڈی ایم اے) نے شہریوں کو خبردار کیا ہے کہ موسم گرما کی جھلسا دینے والی ہوا جان لیوا ثابت ہو سکتی ہے۔تفصیلات کے مطابق نیشنل ڈیزاسٹر مینجمنٹ اتھارٹی (این ڈی ایم اے) نے گرمی کی شدید لہر کے باعث شہریوں کے لئے الرٹ جاری کردیا۔جس میں کہا ہے کہ موسم گرما کی جھلسا دینے والی ہوا کی لہر احتیاط نہ کرنے سے جان لیوا ثابت ہو سکتی ہے، گرمی کی شدت سے بچنے کیلئےسادہ پانی کا استعمال زیادہ کریں اور کاربونیٹڈ مشروبات سے پرہیز کریں۔این ڈی ایم اے کا کہنا ہے کہ دن کے گرم ترین اوقات میں باہر نکلنے سے گریز کریں ، تیز دھوپ میں سر ڈھانپ کر باہر نکلیں اور نمکیات کی کمی کو پورا کرنے کیلئے لیموں پانی اور او آر ایس پئیں۔الرٹ میں کہا گیا ہے کہ ہلکے اور نرم کپڑے پہنیں، گرمی میں اگر کوئی بیہوش ہو جائے تو سر پر ٹھنڈا پانی ڈالیں اور بیمار، بزرگ، بچوں اور پالتو جانوروں کا خاص خیال رکھیں۔این ڈی ایم اے نے متعلقہ اداروں کو بھی ممکنہ صورتحال سے نمٹنے کیلئے الرٹ رہنے کی ہدایت کرتے ہوئے کہا ہے کہ شدید گرمی کی لہر برفانی علاقوں میں گلیشئر پگھلنے کا باعث بن سکتی ہے۔گلوف کے خدشے سے دوچار علاقے کے مکین باخبر و محتاط رہیں اور کسی بھی ہنگامی صورتحال میں مقامی انتظامیہ سے تعاون کریں۔این ڈی ایم اے نے مزید کہا کہ سیاح اس دوران ممکنہ گلوف والے علاقے میں سفر اور رہائش سے گریز کریں، بروقت حفاظتی انتظامات گلیشئر کے پگھلنے سے ہونے والے نقصانات سے بچاؤ میں مددگار ثابت ہو سکتا ہے۔

اس خبر پر اپنی رائے کا اظہار کریں

اپنا تبصرہ بھیجیں