صوبائی وزیر تعلیم پنجاب مراد راس نے کہا ہے کہ محکمہ اسکول ایجوکیشن پنجاب کو رواں سال کے آخر تک مکمل طور پر ڈیجٹلائز کر دیا جائے گا۔
تفصیلات کے مطابق صوبائی وزیر تعلیم پنجاب مراد راس کی زیر صدارت سی ای اوز کانفرنس کا انعقاد ہوا جس میں تمام اضلاع کے سی ای اوز کی جانب سے یکساں نصاب تعلیم، ویکسینیشن اور نجی اسکولوں کی رجسٹریشن کے حوالے سے تفصیلی بریفنگ دی گئی۔
وزیر تعلیم پنجاب مراد راس نے کہا کہ محکمہ تعلیم میں وہی لوگ رہیں گے جو بہتر سے بہتر کارکردگی کا مظاہرہ کریں گے ، محکمہ اسکول ایجوکیشن پنجاب کو رواں سال کے آخر تک مکمل طور پر ڈیجٹلائز کر دیا جائے گا ، گزشتہ چند سالوں کے دوران محکمہ تعلیم پنجاب میں ٹیکنالوجی کی مدد سے انقلابی تبدیلیاں رونما ہوئیں۔
صوبائی وزیر تعلیم پنجاب مراد راس نے کہا کہ ٹیکنالوجی کے جامع استعمال سے لوگوں کی زندگی آسان ہوتی ہے اور بدعنوانی کا خاتمہ ہوتا ہے ، شعبہ تعلیم کی ترقی و بحالی کے لئے جو اقدامات موجودہ حکومت نے کیے ان کی ماضی میں کوئی مثال نہیں ملتی۔
سی ای اوز کانفرنس کا انعقاد قائد ہیڈکوارٹر لاہور میں کیا گیا اور تمام اضلاع کے سی ای اوز اس میں شامل تھے۔
