161

فواد چوہدری کیخلاف مقدمے کی تفصیلات سامنے آگئیں، وجہ کیابنی ؟ بڑی خبر آگئی

اسلام آباد(نیوز ڈیسک )فواد چوہدری کے خلاف مقدمے کی تفصیلات سامنے آ گئیں۔پی ٹی آئی رہنما فواد چوہدری کو اسلام آباد پولیس نے لاہور سے رات دیر گئے ٹھوکر نیاز بیگ کے قریب ان کی رہائش گاہ سےگرفتار کیا تھا اور اب اطلاعات ہیں کہ اسلام آباد پولیس فواد چوہدری کو موٹر وے کے ذریعے لیکر اسلام آباد روانہ ہو گئی ہے۔فواد چوہدری کے خلاف درج مقدمے کی تفصیلات بھی سامنے آگئی ہیں، پی ٹی آئی رہنما کے خلاف مقدمہ گزشتہ رات تھانہ کوہسار میں درج کیا گیا تھا اور فواد چوہدری کے خلاف کارروائی سیکرٹری الیکشن کمیشن عمر حمید کی درخواست پر کی گئی۔ایف آئی آر کے مطابق فواد چوہدری نے کہا تھا کہ الیکشن کمیشن کی حیثیت ایک منشی کی ہو گئی ہے، جو لوگ نگران حکومت میں لگ رہے ہیں ان کا سزا ہونے تک پیچھا کریں گے، حکومت میں شامل لوگوں کو ان کے گھروں تک چھوڑ کر آئیں گے۔فواد چوہدری نے الیکشن کمیشن، ان کے ممبران اور ان کے خاندانوں کو بھی خبردار کیا تھا۔دوسری جانب پاکستان تحریک انصاف نے فواد چوہدری کی گرفتاری کے خلاف عدالت سے رجوع کرنے کا فیصلہ کیا ہے۔پولیس ذرائع کا بتانا ہے کہ فواد چوہدری کو اسلام آباد منتقل کرنے پر جوڈیشل مجسٹریٹ کی عدالت میں پیش کیا جائے گا اور اسلام آباد پولیس فواد چوہدری کا جسمانی ریمانڈ حاصل کرنے کی استدعا کرےگی۔یاد رہے کہ گزشتہ رات ڈھائی بجے عمران خان کی لاہور سے گرفتاری کی تیاریوں کا دعویٰ کیا گیا تھا جس پر فواد چوہدری سمیت دیگر رہنما اور کارکن زمان پارک میں عمران خان کی رہائش گاہ کے باہر جمع ہو گئے تھے، فواد چوہدری نے اس موقع پر بھی خبردار کیا تھا کہ جو پیچھے سےکٹھ پتلیوں کو نچا رہے ہیں وہ ہوش کے ناخن لیں، عمران خان کو گرفتار کرنا ملک کو توڑنے کی سازش ہے۔پی ٹی آئی رہنما کا یہ بھی کہنا تھا پولیس کو دعوت دیتا ہوں کہ ہمت ہے تو عمران خان کو گرفتار کرے، پورےپاکستان میں احتجاج ہو گا، تمام شہروں کو لاک ڈاؤن کریں گے۔

اس خبر پر اپنی رائے کا اظہار کریں

اپنا تبصرہ بھیجیں